Былааһы - Совекка (Ойуунускай)

Былааһы - Совекка


Сэтинньи сэттистиир күүрээннээх күнүгэр,
Сэриинэн сэтэрэн, уотунан умайан,
Сир ийэ үрдүнэн силлиэлээх холорук
Силлиэрэн-боллоорон ытыллан таҕыста...

 
Бары баар баттаммыт
Барыта тахсаннар,
Барабаан охсоннор »'
Баргыһан бардылар...
    Уруйдааҥ!
    Уруйдааҥ!
Былааһы — Совекка!

Хара хаан олбохтоох капитал оло5ун,
Хап гынар хаппардаах хаан салын хаайыытын,
Түп гынар түптүрдээх түүнүктээх түрмэтин
Түҥнэри ытыйан, күөрчэхтии көтүттэ...

Өлөртөн куттаммат,
Өргөстөн дьулайбат,
Кэннинэн кэхтибэт
Кэм кэллэ быһыылаах...
Уруйдааҥ!
Уруйдааҥ!
Былааһы — Совекка!

Хандала күүһүнэн, хабала дьайынан
Хамныыртан-хараттан хааныттан хараммыт,
Кыраттан-кыамматтан, дьон-норуот соруттан,
Кырыыстан-ынчыктан баараҕай баайдаммыт
Баай бампыыр батталын,
Батталлаах былааһын
Үлэһит, бааһынай
Үҥүүнэн үрэйдэ...
Уруйдааҥ!
Уруйдааҥ!
Былааһы — Совекка!

Имэҥнээх санаанан, илбистээх ырыанан
Ийэ сир үрдүнэн, аан дойду баһынан
Кытыастар хаанынан, кырбаһар уотунан
Кырыыстаах дойдуну кытыаста салатан,
Биитэр мин, биитэр эн —
Биирдэспит кыайдын диэн
Өрөгөй өлөрсүү
Өһүөнэ үрдээтин...
Уруйдааҥ!
Уруйдааҥ!
Былааһы — Совекка!

Үйэттэн үйэ5э үрүҥ күн анныгар
Үлэһит, бааһынай симэһин сииктэрин,
 
Күдэхтээх күүстэрин күннэри-түүннэри
Күүгэннии оргутан оборо олорбут
Буулаҕа бурсуйу ,
Буруйдаан-сэмэлээн
Үлэһит, бааһынай
Үөрбэҕэ түһэрдэ...
 Уруйдааҥ!
 Уруйдааҥ!
Былааһы — Совекка!

Үлэһит, бааһынай үлэтин түмүктээн
Үүнээхтээн тахсыбыт көҥүлбүт олоҕун
Барыктаах-сарыктаах кыһаҕа кытардан —
Баабырдаан балталаан баргыйан иһиэххэ...

Наахара хааннанан
Набааты охсунан,
Аан дойду үрдүнэн
Арбыйа оонньуохха...
Уруйдааҥ!
Уруйдааҥ!
Былааһы — Совекка!

Бары сир үрдүнэн баай бампыыр аймаҕа
Бары баар баттаммыт хааннарын тоҕоннор,
Уҥуохтаах эттэрин урусхал оҥорбут
Улуу хаан иэстэрин иэстииргэ тэринэн,
Үлэһит, бааһынай
Үҥүүнэн-үөрбэнэн
Тиис тиискэ, хаан хааҥна
Тиийбитин биллиннэр...
Уруйдааҥ!
Уруйдааҥ!
Былааһы — Совекка!

Үлэһит, бааһынай этигэр-хааныгар
Үйэттэн үйэҕэ үөдүйэн үөскээбит,
Иҥээхтээн сылдьыбыт илбистээх үөрэхтэр
Имэҥнээн-илбистээн, кыырыктаан-кылыстаан,
Баттаммыт туруута
Большевик партия
Кынаттаах тылынан
Кыайыыта үрдээтэ...
Уруйдааҥ!
Уруйдааҥ!
Былааһы — Совекка!
 
Уон сылга уот төлөн күүһүнэн күүрэммит —
Уруйдаан, айхаллаан, советскай былааһы
Аан дойду алтаттан биирдэрин үрдүгэр
Аарыктаан айдаардан үрдэтэн эрэбит...
Биитэр мин, биитэр эн —
Биирдэспит кыайдын диэн
Бары сир баһынан
Баттаммыт баргыйдын...
Уруйдааҥ!
Уруйдааҥ!
Былааһы — Совекка!


29.ХII-1926, Москва к.