Бүгүн ааспыт үйэнэн (Моисей Ефимов)
(Мантан: Бүгүн ааспыт үйэнэн көстө)
Бэҕэһээ кэлэр кэминэн
Толоортум ырыам чороонун.
Бүгүн ааспыт үйэнэн
Мин олоробун.
Аҥылыйар ыар сытынан
Хотонноох балаҕаным.
"Хаачыгы-ыр" гынан арылынна
Чэҥнээх халҕаным.
Нэһилиэгим сис кинээһэ
Ыадастан, аҥнан киирдэ.
Имик-самык дьиэм иһэ
Эбии күлүгүрдэ.
Куттанаммын, торбос сонум
Тэллэҕэ илибириир.
Суостаах сүдү тойонум
Миэхэ дибдигириир:
— Иэскин-күүскүн эн өрүү
Төлөөбөтөх буруйгар
Баайгар дуолгар бүтүннүү
Уоппус оҥоһуллар!
— Тойонуом, баайым диэхтээн,
Биир эрэ ынахтаахпын...
— Өйдөө ону, киһийдээн,
Мин ылыахтаахпын!
Оҕолорум ытастылар,
Ытыыр-соҥуур кэргэним,
Ити курдук ыал аатыттан
Дьэ эһиннэҕим.
Кэбис, ааспыт кэминэн
Мин олорумуум.
Бүгүҥҥү кэскилбинэн
Хоһооммун толорунуум.