Ким барыта бу дойдуга (В. Потапова)

←Мин ханнык уоскулаҥы көрдүүрбүн (В. Потапова)

Сүрүн сирэй
(Хоһооннор)
[[Кутурҕан Куо, Варвара Потапова|Кутурҕан Куо, Варвара Потапова]]

Ким барыта бу дойдуга
Кими эрэ таптыыр, аһынар.
Уонна олоҕун устатыгар
Тугу эрэ айар, уһанар.

Сорох мас суорар, таҥастыыр —
Саҥа дьиэ кылбайан тахсар,
Сорох түннүк таастыыр —
Күн сырдыгын хомуйсар.

Атыттар бурдук ыһаллар —
Өлгөм үүнүүнү бэрийэллэр,
Сааланан бултуу бараллар —
Илии тутуурдаах эргилэллэр.

Хайалара эрэ дьону үөрдээри,
Киһи олоҕун кэрэнэн симээри,
Хаарга сибэкки үүннэрэр,
Үтүө санаа күөҕү тилиннэрэр!

Кутуйах бурдук хаһаанар,
Тииҥ да ойуоккалаабат мээнэ,
Ким-туох барыта кыһанар —
Дьылтан дьыл дьолун эбинэ.

Ким барыта бу дойдуга
Кими эрэ таптыыр, аһынар.
Уонна олоҕун устатыгар
Тугу эрэ айар, уһанар.