Күрүлэс күргүөм күннэргэ —
Күндэл дьэргэл мичээргэ
Көтөр дьырылас ырыатыгар,
Көмүс долгун алааспар
Көрүлүү көтө дайбакка,
Көҥүл тыына туойбакка,
Балаҕаҥҥа сыттамый,
Балаадыйан хаалламый?!
Сайаҕас салгын баалыгар,
Сайдам мүөттэй дыргылыгар
Бигэнэ уста сылдьарбын,
Биэрэҥ эрдэ дайбыырбын
Алаас сүмэҕэр үөскээммин,
Арыы чэл күөх күлэммин,
Алыс даҕаны таптыыбын,
Аралдьытар булбаппын.
Аны аҕыйах кэминэн
Араалаһар кэккэнэн,
Артыалынан күргүөмнээн,
Алардаһан сиэттиһэн,
Бастыҥ хотуур үлэтигэр —
Майдаан-айдаан дьаарбаҥа
Хоруйа охсо киириэхпит,
Хоһоон-ырыа тэнитиэхпит.
