Мин тугум буруйай?

Үс төгүл хаһыакка

Дьүһүммүн оҥоотторо,

Үс төгүл айыкка

Дьүүлүнэн толоотторо.

Мин онно, мин тугум,

Мин тугум буруйай?

Минньигэстик

Үөхсүбүтүм буолуо арай.


Маҥнайгыта маннык:

Оҕолор анньыалыыллар,

Кыараҕас да муннук

Кыһыйдым: тэбэн ыллар…

Мин онно, мин тугум,

Мин тугум буруйай?

Минньигэстик тэппитим буолуо арай.


Иккиһэ: кылааска

Паартабын уруһуйдуу,

Инчэҕэй кырааска

Илби сыбыы олордум.

Мин онно, мин тугум,

Мин тугум буруйай?

Миэстэбин

Киэргэппитим буолуо арай.


Үсүһэ оруокка:

Үстэ кэллим хойутаан.

Күн ааҕар субуокка

Үстэ кыайда хоруотаан.

Мин онно, мин тугум,

Мин тугум буруйай?

Бэйэм ааппын

Хараарпытым буолуо арай.


Өссө маннык баара:

Көрсүө, бытаан уолчаантан,

Муннун тоҕо саайаат

Муннукка саһан хаалтым…

Мин онно, мин тугум,

Мин тугум буруйай?

Муокастаабыт

Айылаах буолуом арай.


1936 с.