Москва сырдыга


Саһархай, сырдык харахтаах
Саха кыыһын санатар
Тайҕа нарын титиригин
Лабаатынан далбаатаан,
Мичилийэ керсөр миигин
Мэлдьи Москва барахсан.
Оо, Москва! Туохтан даҕаны
Ордук эйигин саныыбын.
Көҥүл көтөр — күөх халлааны,
Оҕо — көмүс уйатын,
Саха — тыаны, туундараны
Таптыырыныы таптыыбын.
Эн айбыт аҕабыттан ордук
Төлкөбүн түстээбитиҥ,
Ииппит ийэбиттэн ордук,
Ийэм, миигин ииппитиҥ,
Таптыыр доҕорбуттан ордук
Таптаабытыҥ эн миигин.
Москва! Үс ыйдаах түүннэрбин
Эн күнүҥ уота үүрбүтэ,
Ирбэт чэҥнээх хоту сирбин
Эн итииҥ ириэрбитэ.
Дьол күндү тааһын эн илииҥ
Мин норуоппар биэрбитэ.
Аан дойду сааскы сарыала,
Хагдарыйбат аал-дууба,
Эн суоҕуҥ эбитэ буоллар —
Дьол суох бу аан дойдубар,
Октябрь умуллубат факела —
Эн бааргын, улуу Москва!