Түүн үөһэ.
Күлүктээх саад иһэ.
Туолбут ый толонноох сандала
Тунааран, сэлэ мас быыһынан санньыйар.
Сэмэйдик сэһэргии сиккиэр тыал илгийэр.
Сэбирдэх тэлимнии сипсиһэр,—
Имэҥнээх кэм иэйэр,
Иҥ кэйэр.
Дьол, үөрүү.
Көмүскэ уутунуу,
Фонтаммыт ибиирэр таммаҕа —
Чуумпу түүн ньууругар чоккуруур бырдаҥа,
Чуу... ыраах... Бетховен... сүрэҕи манньытар...
Музыка санньыара долгурар...
Ыйдаҥа сыдьаайар.
Ыллаһар...
