Утуйа сытан баттаппыт (Алампа)

Утуйа сытан баттаппыт




Салбаннаах санаа сарбыллара,
Өрөгөйдөөх өй өһөрө,
Кэтит кэскил кэхтэрэ,
Кэрэгэй кэмэлдьи кэтириирэ
Кэлбит эбит буоллаҕа...
Аны

Киһи буолар кэскилбин
Ким кэлэн кэпсиэй?...
Мин кимминий?...
Мин ханна хаайтардым?
Мин киһи этим...

Кини кимий?
Кини киһи!...
Оччоҕо тоҕо
Мин

Оонньуулаах олохпун оруойдуур?
Оҥоруу бөҕө охторуор дылы
Олоруохпун баҕарабын!...
Кырдьык диэн тугуй?
Кырдьык – кыһыл көмүс,
Аат диэн тугуй?
Аан дайды албына...

Оччоҕо тоҕо
Аналлаах олохпун аймыыр?
Аналынан арахсыахпар дылы
Ааттаһабын даа, атастаар,
Аан дайдым аймаҕыттан
Арахсыахпын баҕарбаппын!...

Күнтэн ылбыт
Күндү көҥүлбүн
Ким көтүрэр?
Киһи...
Киһи даа, киһи даа?...
Киһи диэн кимий?...
Эппэт... эппэт...
Һуу!!!

Тыыным хаайтарда,
Сүрэҕим мөҕүстэ,
Тугуй бу?
Тулуйумаары гынным...
Кэтит сир киэлитэ
Киэҥ да этэ,-
Кыараатаҕа кыһалҕатын нии...
Олуйумаҥ даа!

Орто дойду олоҕор
Олоруохпун баҕарабын...
Олоруохпун баҕарабын...
Һуу!...

Ыксаары гынным,
Ыгыма даа,
Ыарахана ыксатта.
Баттаама даа баттаама,
Балаҕадыйан бардым...
Баттыыр, баттыыр...

Ким баттыырый?
Киһи...

Мин эмиэ киһибин...
Мин эмиэ киһибин...
Кэбис, кэбис, киэр буол!
Тутума даа, турабын!...
Туруорбат.

Олоруохпун баҕарабын,
Олоруохпун баҕарабын!...

Ээ, үрүҥ күн үтүөтэ,
Өрүһүй даа!...
Ээ, күөх тыа көҥүлэ,
Көмүскээ даа!...

Мин киһибин... Мин киһибин...
Олоруохпун баҕарабын.

Сырдыкта, сырдыкта!...
Көҥүллээ, көҥүллэ!...

Һуу! Тумнастаары гынным,
Тулуйбатым, тугуй бу!...



1921 c.