1
Уоттаах сэрии ардыгар
Дойдум сытын ахтарым,
Омук сирин маарыгар
Ходуһабын саныырым.
Ахтылҕаным тахсыахтык.
Оттоон, санаам тарҕыаҕа,
Артыал дьоно хайгыахтык
Охсуом, мунньуом буоллаҕа.
2
Хойуу нуолур оппут үүммүт байымнык,—
Хотуур хоппот, муспат аттаах тараанньык,
Олуур хаттаан ардахтыаҕа, куйааска
Охсон, мунньан — хомуйбахтаан хаалыахха,
Сытыы хотуур чаҕылыҥныы сырдыргыыр,
Сыыйа быһан косилкабыт кырдыргыыр.
Охсооччулар, мунньааччылар күлсэллэр,
3
Кэккэ тахсан, сырсан охсон,
Тириттибит-хоруттубут,
Киэһэ ахсаан, сыыдам-дохсун
Киирсиибитин тохтоттубут.
Туругурдун, сыламыран,
Сырал күммүт буһугуран,
Мунньулуннун, бугулланан,
Сыалаах оппут, күөхтүү кууран!
4
Үрэллигэс кыымнанан,
Отуу уота кытыастар,
Үлэ бүтэн, сынньанан,
Оҕо дьоммут кылыйсар.
Сиккиэр тыалым уураатын,
Этим-хааным чэбдийэр,
Сибэккилээх былаатыҥ,
Этий, ханна тэтэрэр?
5
Күрэстэһэн, доҕоччугум, тарааҥҥын
Сыралҕаҥҥа бустаҕыҥ,
Күнү быһа толоон иэнин хастааҥҥын,
Сылайбытыҥ буолуоҕа.
Кэлий бэттэх, уста оонньуох тыыланан,
Кыырпах долгун оргуйар.
Киэһэ сөрүүн салгын мүөттээх сытынан
Кымыс курдук, дыргыйар.
6
Бөтүүк басгаан ыллыыта,
Күлүм сарыал тыгыыта,
Мунньуу, охсуу күрэҕэр
Туруннубут үлэҕэ.
Сүрэх үөрэр: үлэттэн,
Сөрүүкэтэр сиккиэртэн,
Сэргэхсийэр санааттан,
Сибэккилээх былааттан...
