Үөдүгэй бэҕэһээ уонна бүгүн (Шамаев И.И.)/II чааһа Үйэлэр кирбиилэрэ/Гражданскай сэриигэ Кыһыл дружинаҕа кыттыбыт байыастар

Гражданскай сэриигэ Кыһыл дружинаҕа кыттыбыт байыастар

1. Иванов Трофим Васильевич (Бурҕаа). 1900 сыллаахха II Үөдүгэйгэ төрөөбүтэ. 1934 сыллаахха Алдаҥҥа олорон өлбүтэ.

2. Борон Митрофан Федорович. 1904 сыллаахха II Үөдүгэй нэһилиэгэр төрөөбүтэ. Бандьыыттары утары Ньурбанан, Сунтаарынан сылдьыһан сэриилэспитэ. 1923 сыллаахха Бэдьэкэ бандьыыт баандатын тутуспута.

3. Павлов Гаврил Федорович (Хабырыыска). 1898 сыллаахха II Үөдүгэй нэһилиэгэр төрөөбүтэ. Аатырбыт кыһыл партизан быһыытынан биллэр.

4. Павлов Федор Федорович (Болтуо). 1890 сыллаахха II Үөдүгэй нэһилиэгэр төрөөбүтэ. Бандьыыттары утаран Ньурбанан, Сунтаарынан сылдьыһан сэриилэспитэ. Кини Харабаев Иван Егоровиһы (Муос Харабаайы) кытта Үөһээ Бүлүүттэн Бүлүү уокуругунааҕы байыаннай штабка 1922 сыллаахха өрүс мууһа уста турдаҕына мууһу кытта, арбаҕынан хаххаланан, айаннаан улахан суолталаах тыллабыры киллэрбитэ. 1931-1932 сыллаахха II Үөдүгэй нэһилиэгин Советын председателинэн үлэлээбитэ.

5. Егоров Максим Егорович (Боппос уола). 1881 сыллаахха Куорамыкыга төрөөбүтэ. 1927-28 сылларга контрреволюционердары эһиигэ Р.И. Кардашевскай партизанскай этэрээтигэр сылдьыспыта. 1933 сыллаахха өлбүтэ.

6. Григорьев Даниил. II Үөдүгэй киһитэ. Милиционер.

7. Ботаков Кирилл Григорьевич. II Үөдүгэй нэһилиэгин киһитэ. Волревком үлэһитэ. Далырынан, Үгүлээтинэн эргийбитэ.

8. Тобохов Иван Алексеевич (Бордур уола). 1904 сыллаахха II Үөдүгэй нэһилиэгэр төрөөбүтэ. Улуус оскуолатын бүтэрэн баран 1921 сыллаахха Бүлүү куоратыгар киирэн комсомол активнай чилиэнэ буолбута. Ити сыллаахха Якутскайга рабфакка үөрэнэ барбыта. Онтон ЧОН ротатын саллаатынан буолбута. 1922 сыл олунньу 22 күнүгэр Павловскай уонна Табаҕа икки ардыларыгар бандьыыттар төгүрүктээһиннэригэр түбэһэн ботуруона бүтүөр диэри хорсуннук сэриилэһэн өлбүтэ.

9. Григорьев Дмитрий Михайлович (Мотуруос). 1900 сыллаахха Үөһээ Бүлүүгэ төрөөбүтэ. Тулаайах уол борокуокка мотуруостаабыта. ЫРКС чилиэнэ. Н.И. Снитко этэрээтигэр сылдьан Хохочойго комсомолецтары кыргыбыт бандьыыттары урусхаллааһыҥҥа инники кэккэҕэ сылдьан 1922 сыл муус устар 18 күнүгэр өлбүтэ.

10. Винокуров Николай Егорович. 1905 сыллаахха Үөһээ Бүлүүгэ төрөөбүтэ. Орто Бүлүүгэ В. Шатаев этэрээтигэр тахсан иһэн Хохочойдооҕу тоһууртан куоппутун бандьыыттар тутан ылан Хампаҕа илдьэн ыппыттара.

11. Салашин Гаврил Михайлович. 1889 сыллаахха II Үөдүгэй нэһилиэгэр дьадаҥы кэргэҥҥэ төрөөбүтэ. Үөһээ Бүлүүгэ, Ньурбаҕа, Сунтаарга буолбут кыргыһыыларга сылдьан баран Бодойбоҕо о.д.а. сирдэргэ Совет былааһын олохтооһуҥҥа активнай кыттыыны ылбыта. 1922 сыллаахха Төхтүргэ уонна Киллэмҥэ үрүҥ баандалары урусхалласпыта. 1923 сыл саас Саһыл Сыһыы оборонатыгар кыттан пепеляевщинаны бүтэһиктээхтик үлтү сынньыспыта. Дойдутугар кэлэн Советтар үлэлэрин сүһүөҕэр туруорууга, колхозтары тэрийсиигэ активнайдык үлэлээбитэ. Дойдутугар олорон 1964 сыллаахха өлбүтэ.

12. Потапова-Габышева Марфа Георгиевна. Үөһээ Бүлүүгэ атыыһыт Потапов кэргэнигэр төрөөбүтэ. Якутскайга үөрэнэ сылдьан 1917 сыллаахха революционнай охсуһуу суолугар туруммута. Коммунист. 1922 сыллаахха Бүлүү куоратын оборонатын активнай кыттыылааҕа. Кэлин советскай, партийнай үлэһит, Москва куоракка олорбута. Бэйэтин кэриэһин толорон күндү уҥуоҕа дойдутугар Үөһээ Бүлүүгэ аҕалыллан Чардааҥҥа кистэниллибитэ.

13. Потапова-Шапошникова Мария Георгиевна. Үөһээ Бүлүүгэ төрөөбүтэ. Потапова-Габышева Марфа Георгиевна бииргэ төрөөбүт балта. Комсомолка. Бүлүү оборонатыгар кыттыбыта. Кэлин учууталлаабыта. Нам улууһугар пенсияҕа олорон өлбүтэ.

14. Иванов Никифор Михайлович – Мотуруос. Бартыһаан Салааһын бииргэ төрөөбүт быраата. Хохочойго тоһуурга 17 комсомолеһы кытта өлбүтэ.

«Үөһээ Бүлүү. Бэҕэһээ. Бүгүн. Сарсын» кинигэттэн быһа тардан ылылынна