Тэһийбэт, тэһиккиир киэһэҕэр... (Варвара Потапова)

←Таптыыбын эйигин, таптыыбын!..

Сүрүн сирэй (Хоһооннор) [[Кутурҕан Куо, Варвара Потапова|Кутурҕан Куо, Варвара Потапова]]

Хахыйах ырыата→

Тэһийбэт, тэһиккиир киэһэҕэр

Кэтэһээр миигин, кэтэһээр,

Эйиэхэ түүлгэр кэлэрбэр

Эрэнээр миигин, эрэнээр.

Аттыгар аргыый чугаһыам,

Ааттал тылларын сипсийиэм,

Төбөҕүн түөспэр сыһыарыам,

Сылаас тыыммынан имэрийиэм.

Буруйдуом суоҕа эйиигин

Бутуурдаах күнүкү иэйиигин,

Кимниин эрэ сэлэспиккин,

Кимҥэ эрэ илиигин биэрбиккин...

Бырастыы гыныам барытын,

Баалыам суоҕа букатын -

Дьулусхан дохсун иэйиигин,

Дьолу дьоннуун үллэстиигин.

Арай хоргутуом адьаһын,

Хомойо кэмсиниэм бэйэбэр

Санньыйар, санааргыыр санааҕын

Сонньуйа ким эрэ истиэҕэр...

Тэһийбэт, тэһиккиир киэһэҕэр

Кэтэһээр миигин, кэтэһээр,

Эйиэхэ түүлгэр кэлэрбэр

Эрэнээр миигин, эрэнээр.

---