Хара банаар харахтаах... (Сайа) Аата суох сибэкки
Дом...
Сайа
Сайа


Ийэлээх оҕо
ийэтин иннигэр кэлэн
иэнигийэ тохторун курдук,
Аҕалаах оҕо
аҕатын иннигэр кэлэн
албадыйа айгылларын курдук,
Ааттаһыылаах алтан айах
мин буолан,
Көрдөһүүлээх көмүс айах
мин буолан,
Тоҕус толомон халлаан
Торҕо дьолуо аартыктарын
Домнуур дорҕоон тойуктанан,
Аҕыс аламай халлаан
Ардай дьолуо аартыктарын
Арчылыыр албан ырыаланан,
Сэттэ сэгэйэр халлаан
Сэттээх сэрэбиэй аартыктарын
Сэлбийэр сэтии сэһэннэнэн,
Албан-далбан
Ааккытын ааттаан
Айаатаан эрэбин
Ахтар Айыыларыам,
Сургуллар
Суон сураххытын сураан
Суруйан эрэбин
Суо-хаан иччилэриэм!
 
Тыал тыаһыттан тыҥаан,
Самыыр тыаһыттан самнан,
Хаар тыаһыттан ханнан
Хаһааҥҥа диэри
Хабахха тыынабыт?
Уруйу уунан
Урааҥхай омугу
Олохтообуккут буолбаат,
Саргыны санаан
Саха аймаҕы
Салайбыккыт буолбаат!
Көрүҥ эрэ:
Көҥүлбүт —
Көлдьүн тыл буолбутун,
Сабаҕалааҥ эрэ:
Саргыбыт —
Саатал тыл буолбутун,
Ундаардааҥ эрэ:
Уруйбут —
Оҥоһуу тыл буолбутун...
Көҕөрөр урсуммут
Көрдөрөн туран
Көйүү ойбоннуу
Көҥөрүтэ барбытын,
Маанылаах маспыт
Маҥырыы туран
Баранан хаалбытын,
Хаарыан хатыҥмыт
Хаһыытыы туран
Хахыччы хаппытын,
Оһуордаах оппут
Орулуу туран
Ордубакка охтубутун...
Үүс тириитин курдук,
Үтүө майгы
 
Үтүргэҥҥэ барбытын,
Киис тириитин курдук,
Килбиэн санаа
Кистэлэҥҥэ хаалбытын...
Албан-далбан
Ааккытын ааттаан
Айаатаан эрэбин
Ахтар Айыыларыам,
Сургуллар
Суон сураххытын сураан
Суруйан эрэбин
Суо-хаан иччилэриэм!
Куотан эрэр
Куппутун куоһааҥ,
Сүтэн эрэр
Сүрбүтүн сүрүннээҥ,
Иинэн эрэр
Иэммитин иччилээҥ!
Кыыгыныы тыаһыыр
Кыаһааҥҥа кыттыһыҥ,
Хоҥкунуу оонньуур
Хобоҕо холбоһуҥ,
Дүрбүотүү түллэр
Дүҥүргэ этиниҥ!
Самыыр тыаһыттан
Самнан турбат
аргыны салайыҥ,
Тыал тыаһыттан
Тыҥаан биэрбэт
Ыйааҕы ыйыҥ,
Хаар тыаһыттан
Ханнан хаалбат
Хататы саҕыҥ!
Дом! Дом! Дом!